Tredòs
Descripcion
Eth pòble de Tredòs (170 abitants) se trape a 1.348 m de nautada ara drèta der arriu Garona. Compde damb tres glèises romaniques, era capèla dera Vèrge deth Rosari, petita capèla rectangular sense absida en tot tocar ath pònt sobri eth Garona, damb un petit campanau adossat ath mur nòrd.
Laguens dera poblacion, destacar era pica beneïda deth vestibul, damb basa atica romana de marbe blanc fòrça plan trabalhada; era glèisa de Sant Esteve, ei ua petita capèla dera prumèra meitat deth sègle XI ara quèrra der arriu damb un campanau que barrège era tòrre e espadanha, damb ua originau pica beneïda.
Ath nòrd dera poblacion, abans d’arribar a Tredós dempús de Salardú, i a era glèisa d’Èra Mair de Diu d’Aran, qu’ei un interessant temple romanic de proporcions considerables, ei un magnific exemplar romanic deth sègle XI enes parts mès antigues. Compde damb ua planta basilicau de tres naus paralleles, mès desiguaus, que se junhen mejançant un espaci presbiteral, damb es tres absides. A dus campanaus, un de tòrre exempta e er aute de cadireta. Laguens deth tèmple destaque eth paviment deth presbiteri centrau, qu’ei mès elevat qu’eth dera rèsta dera glèisa a causa d’ua petita cripta que se lòtge dejós sòn a on siguec trobada segontes era tradicionau imatge dera Mair de Diu de Cap d’Aran, patrona deth lòc, talha romanica d’uns 40 cm que siguec destruïda eth 1936. Er interior dera glèisa contenguie un conjunt d’interessantes pintures muraus romaniques, actuauments exposat en musèu “The Cloisters” de New York.