Era Entitat Municipau Descentralizada de Unha a creat ua alternatiua entà poder milhorar era circulacion deth transit pendent aguest mes d’agost ena localitat. En aguest sens, s’a plaçat ena part iniciau e centrau deth pòble dus semafòrs entà poder regular d’ua forma adequada er accès des veïculs ad aguest entorn.
Aguest hèt respon a qu’eth pas peth carrèr Major de Unha compde damb zònes a on era via ei fòrça estreta e s’auien produsit taponaments e retencions que non permetien eth pas ne de veïculs ne de pedons. Era pròva pilòt a dia d’aué sonque ei contemplada entath mes d’agost, qu’ei un des que mès afluéncia i a en tot er an en municipi.
Eth baile pedani, Josè Paba, afirme que “damb aguesta mesura, des dera EMD de Unha, volem garantir qu’era poblacion non se sature en epòques de maxima afluéncia de visitaires. Ath delà, generam ua major seguretat des vesins que passègen per aguest espaci e dam responsa a que s’i a bèra emergéncia, i pogue auer un accès mès simple sense cap tipe de restriccion”.
D’un aute costat ahig que “sabem que Unha ei un endret damb un gran nombre d’atractius e es persones que s’apròpen an a an creishen exponenciaument e mos hè a préner determinacions d’aguest estil pr’amor qu’ei actuauments impossible agranir eth carrèr perqué i a abitatges ath torn d’eth”.
Era travessia entre es dus semafòrs compren un espaci de 120 mètres lineaus damb 40 segons de lum verda entath pas e 50 segons de lum vermelha entà perméter eth pas der aute costat dera circulacion.