Eth hestau aranés de Pyrenades, dedicat ath pireneisme, torne dempús d’èster dus ans arturat pr’amor dera crisi sanitària deth coronavirus. Enguan arribe ara sua detzau edicion e se pòt amiar a tèrme gràcies a qu’es protocòus actuaus mercadi peth Departament de Salut dera Generalitat de Catalonha atau ac indiquen perqué non i a granes restriccions ne un risc elevat de transmission comunitària per coronavirus.
Pyrenades ei un hestau que s’amie a tèrme ena poblacion de Salardú e que se caracterize per dar a conéisher eth pirineisme e toti es sòns airaus mejançant ua sèria de conferéncies, exposicions, visionat de pellicules o activitats ar aire liure. En aguest sens, Pyrenades, supause un gran impacte economic entath municipi de Naut Aran pr’amor que s’apròpen ath torn de 1000 persones pendent es 7 dies que dure aguest eveniment.
En aguest sens, es dies escuelhudi entà gaudir de totes aguestes activitats comprenen deth 10 ath 16 d’abriu, en tot coïncidir justament damb era Setmana Santa entà poder atrèir non sonque as vesins dera Val d’Aran, senon tanben a toti es visitants que vòlen passar es sues vacances en territòri o desiren profitar es darrèri dies d’esquí en domini de Baqueira Beret.
Eth baile de Naut Aran, César Ruiz-Canela, destaque que “ei fòrça important entà nosati poder recuperar ua hèsta d’aguestes caracteristiques dempús de tant de temps sense poder hèr-la. Pyrenades ei un referent en nòste calendari annau de Naut Aran e volem que sigue atau per fòrça ans.”
Sus aguest ahèr, cau destacar que serà eth darrèr an que se hèsque eth hestau en Refugi Ròsta de Salardú pr’amor qu’es propietaris e organizadors der eveniment finalizen era sua etapa laborau e serà er Ajuntament de Naut Aran qui s’encuedarà a compdar dera següenta edicion de toti es ahèrs logistics e organizatius.
En aguest sens, Ruiz-Canela afirme que “voi arregraïr publicaments a Manel Rocher era sua grana implicacion pendent toti aguesti ans entà que s’age pogut amiar a tèrme Pyrenades d’ua forma tan espectaculara. Mos a mercat eth camin a seguir ath futur”.
Es objèctes restacadi ath pireneisme que se tròben actuauments en Refugi Ròsta passaràn a formar part dera colleccion istorica d’elements que conformen eth Musèu dera Nhèu plaçat en pòble d’Unha entà enriquir eth sòn valor culturau.