Aguesta setmana a tornat a començar eth projècte “Botja-te” damb eth que se pretèn qu’es persones dera tresau edat deth municipi de Naut Aran poguen mantier abituds saludables, atau coma apréner naues abilitats e aufrir-les un acompanhament psicologic que les permete gaudir mès e d’ua forma diferenta e divertida deth sòn temps de léser.
Aguest programa auec de suspener-se per aument de positius per coronavirus ena Val d’Aran e entà garantir era seguretat des sòns participaires. Ara, s’an tornat a repréner es activitats un viatge a baishat era incidéncia de casi en territòri damb eth prètzhèt d’aufrir era milhor experiéncia possible tàs persones apuntades.
Eth projècte “Botja-te” aufrís era possibilitat de, pendent dus dies ara setmana, realizar activitats fisiques de baish esfòrç entà poder mantier un milhor estat de forma damb exercicis de gimnastica especifica, atau coma d’autes activitats coma talhèrs de ceramica, gessudes culturaus o excursions per diferentes zònes deth municipi qu’an un gran atractiu coma eth “Camin dera Bruisha” de Tredòs o eth romanic de Naut Aran.
Eth baile municipau, César Ruiz-Canela, destaque que “eth projècte de ‘Botja-te’ pòrte dejà 18 ans en funcionament e açò demòstre eth sòn gran succès entre era nòsta gent grana deth municipi. Ei eth milhor esturment entà que toti eri poguen gaudir dera companhia de granes persones e que poguen gaudir mès era sua jubilacion que tant s’an guanhat damb eth pas des ans.”
Ath delà, explique que “era nòsta gent grana de Naut Aran son ua des nòstes prioritats e tostemp trabalharam ena linha d’aufrir-les es milhors possibilitats e aufèrtes entà que poguen èster distrèiti e damb era milhor salut possible. Un exemple en son es activitats de Marcha Nordica qu’auem impulsat pendent aguest passat mes de hereuèr”.
Er Ajuntament de Naut Aran subvencione totes es activitats e aufrís era possibilitat de transpòrt damb autobús sense cap tipe de còst des dera madeisha poblacion de residéncia dera gent grana entà que poguen anar tà toti es talhèrs que s’aufrissen. Aguest programa ei totauments gratuït e encara i a places entà inscriuer-se damb data limit enquia aguest 15 de març.