Salardú a estat escuelhut coma eth lòc que s’harà eth cuertmetratge dera directora lheidatana Gisela Serra nomentat “Arrels” e que s’amiarà a tèrme pendent eth mes de junhsèga en municipi.
Arrels ei protagonizada per tres personatges: en prumèr tèrme, Itziar, ua gojata de 24 ans de Barcelona qu’arribe ena Val d’Aran en un moment que se trape perduda e en un mar de dobtes; Tato, un pair-sénher dera poblacion de Salardú de 84 ans, e que patís alzheimer e Alma, ua hemna de 35 ans tanben de Salardú.
Es responsables d’aguesta filmacion contactèren damb er Ajuntament de Naut Aran mesi endarrèr en tot sollicitar supòrt economic entà poder amiar-la a tèrme e, des deth consistòri, s’aufric ua ajuda de 1000 èuros entà sufragar es diuèrses despenes que podessen auer. Sus açò, eth baile de Naut Aran, César Ruiz-Canela, destaque que “quinsevolh accion que vage a servir entà promòir eth nòste municipi ei fòrça positiua. Era tematica ei fòrça atractiua e credem que cau aportar oportunitats a persones que cerquen dar a conéisher eth nòste parçan.”
Ath sòn torn, era productora deth cuertmetratge Arrels, Júlia Boqué, explique que “auem volut gravar era istòria en Salardú pr’amor qu’ei basat es hèts reaus just en aguest lòc. Non podíem escuélher ua auta localizacion que non siguesse aguesta entà hèr er enregistrament”.
Des dera productora informen qu’an daurit ua campanha de mecenatge ‘crowdfunding’ ena que se pòden realizar aportacions entà amiar a tèrme era filmacion dera forma mès excellenta possibla pr’amor qu’es estruments damb es que trabalhen e toti es procèssi que li entoren son fòrça costosi.
En aguest ligam se pòt accedir entà ajudar qu’eth projècte sigue çò de mès realitzable possible: https://ca.goteo.org/project/arrels