Eth Plen der Ajuntament de Naut Aran a aprovat aguest maitin per unanimitat era licitacion entara adjudicacion deth contracte d’òbres entàs 4 viuendes e 9 places de parcatges que se bastiràn ena Plaça dera Pica de Salardú. Aguesta accion, impulsada pera equipa de govèrn de Convergéncia Aranesa, a coma objectiu potenciar eth parc de viuenda assequible municipau.
Aguesta aprobacion compdarà damb 1 mes d’exposicion e, en cas de non auer cap allegacion ne suggeréncia serà considerada aprovada definitivaments. Eth pressupòst de gessuda d’aguesta licitacion serà de 916.000 èuros IVA includit apruprètz.
Seràn, en totau, dues viuendes de dus dormitòris e dues viuendes de tres dormitòris. Eth prètz de loguèr seguirà es madeishi critèris qu’es dera viuenda assequibla de Garòs. Per tant, es de dus dormitòris eth prètz finau serà de 450€ de loguèr mensuau, e es de tres dormitòris, de 600€ de prètz mensuau. Ath delà, tanben se bastiràn 9 places de parcatge que s’aufriràn de loguèr prumèr as futurs abitants des viuendes.
Eth baile de Naut Aran, César Ruiz-Canela, destaque que “seguim en tot trabalhar pes nòsti vesins de Naut Aran. Eth nòste ajuntament trabalhe tà crear mesures dirèctes que poguen auer un benefici entara nòsta ciutadania e aguest n’ei un exemple mès. Era creacion de 4 viuendes dirèctes mès, somades ara de Garòs e era de Tredòs, mos hè a afirmar qu’eth parc de viuenda assequible municipau serà ua realitat ben lèu”.
Eth periòde d’execucion dera òbra serà de 15 mesi. Entà darreries der an 2026 se demore que dejà i poguen entrar a víuer vesins en aguestes viuendes en Salardú.