Er Ajuntament de Naut Aran destinarà 60.000 èuros ara concession d’ajudes economiques as familhes d’escolans d’ensenhament infantil (i3 a i5) e primària (1èr a 6au) que non arreceben cap tipe de subvencion per part d’ua auta administracion publica entath minjador escolar.
Entà poder optar ad aguesta aportacion s’auràn de presentar es factures deth minjador escolar de seteme deth 2023 enquiath mai de 2024 o un certificat emetut pera Associacion de Familhes e Alumnes (AFA) deth còst deth minjador escolar der escolan. Aguesta ajuda de 60.000 èuros prepausada peth consistòri se repartirà entre es sollicitants dera ajuda mès non poderà superar er impòrt des factures presentades en aguesta matèria.
Es escolans empadronadi e residenti en municipi de Naut Aran escolaritzadi ena escòla Ruda de Salardú o Loseron d’Arties no an de presentar cap instància, pr’amor que lo tramitarà dirèctaments er ajuntament damb er AFA d’aguestes localitats. Es que non agen eth sòn centre plaçat en municipi auràn de presentar ua sollicitud a trauès dera sedença electronica dera pagina web der Ajuntament de Naut Aran.
Eth baile de Naut Aran, César Ruiz-Canela, destaque que “Naut Aran ei un municipi que suberges pes sues ajudes sociaus en toti es encastres. Un d’eri ei logicaments er escolar e credem que i a familhes que, malerosament, non arreceben subvencions per part de cap auta administracion, e les supause ua dificultat ahijuda assumir eth còst deth minjador escolar. Per açò, des dera nòsta equipa de govèrn, amiam a tèrme aguesta accion entà milhorar era sua qualitat de vida”.
Eth periòde de presentacion de sollicituds demorarà daurit enquiath pròplèu 21 de junh.