Eth Plen der Ajuntament de Naut Aran a aprovat aguest maitin de forma definitiva damb es vòts a favor dera equipa de govèrn de Convergéncia Aranesa e Aran Amassa e era abstencion d’Unitat d’Aran era taxa servici estacionament e vials publics deth municipi.
Dempús d’èster 1 mes d’exposicion publica, non i a auut cap tipe d’allegacion ath respècte e s’a amiat endauant aguest vist-e-platz per part deth plen entà hèr ua pròva pilòt que gesserà endauant enes poblacions de Garòs, Arties e Salardú. Un des motius pes quaus er Ajuntament de Naut Aran aplicarà aguesta naua normativa ei pr’amor qu’actuauments es finques d’aguestes poblacions son logades per ajuntament e li generen un còst annau e d’aguesta forma se poirà compensar part d’aquest pressupòst.
Era idèa deth consistòri ei era de plaçar parquimètres en aguesti endrets que cruben 0,30 centims era ora, damb era excepcion qu’era prumèra ora serie tostemp gratuïta. Ath delà, es persones que paguen er impòsti de circulacion en Naut Aran poiràn tanben aparcar es ores qu’ac desiren de forma gratuïta. Ei previst qu’era taxa comence era sua aplicacion pendent aguesta sason d’iuèrn.
Eth baile de Naut Aran, César Ruiz-Canela, afirme que “volem qu’es coches non demoren aquiu tot eth dia pr’amor que mos trapam damb situacions que dèishen remòlcs o furgonetes pendent tot er iuèrn e aucupe places que vesins o visitaires poderien emplegar d’ua forma mès eficienta. En aguest cas concrèt, poderàn èster-i ara tanben, mès auràn de pagar aguesti 0,30 centims ara ora. Vam a veir coma foncione aguesta pròva pilòt e coma la podem aplicar pendent aguest periòde.”
Ath delà, des der Ajuntament de Naut Aran, a peticion des vesins de negòcis de bars e restaurants e terrasses, a creat ua normativa entà poder reprodusir musica en dirècte o damb reproductor. En aguest sens, es negòcis que hèsquen musica en dirècte poiràn demanar ua licéncia des 10:00 enquias 23:00 e es que hèsquen a servir un reproductor o similar, enquias 22:00 dera net tostemp e quan se complisque era lei de contaminacion acustica sus es decibèls.