Er Ajuntament de Naut Aran a organizat entad aguest ostieu un programa d’activitats restacades damb eth senderisme e era natura e paisatges deth municipi damb er objectiu qu’es vesins e visitants poguen gaudir des milhors paratges d’aguesta zòna. Entad açò, deth 1 de junhsèga ath 10 de seteme, amassa damb era enterpresa Camins, s’a planificat ua sèria de gessudes setmanaus entà que toti eri poguen gaudir d’aguesta activitat d’òci de montanha unica ena Val d’Aran.
En totau, se realizaràn 40 gessudes qu’includissen era visita ara estacion de Baqueira-Beret, es lacs deth Clòt der Os, eth famós Camin dera Bruisha de Tredòs o es diferenti guardadèrs de Naut Aran coma per exemple eth de Bagergue o eth de Gessa.
Poderàn participar enes activitats totes es persones qu’ac desiren sense establir un numerò maximom d’apuntadi e es rotes son gratuïtes e son tant entà adults coma entà mainatges pr’amor qu’es recorreguts son facils. Sus açò, cau destacar que un dia ara setmana s’aufrirà era possibilitat d’ua rota fòrça facila entà mainatges a compdar de 5 ans.
Eth baile de Naut Aran, César Ruiz-Canela, explique que “aguestes rotes supausen ua forma divertida e diferenta de conéisher es nòsti cornèrs de Naut Aran mès prohonds e espectaculars coma poderie èster per exemple es magnifics lacs deth Clòt der Os, ena zòna de Beret. Aguestes excursions son coordinades per ua enterpresa professionau e poderam aufrir ua experiéncia unica a toti eri e çò de mès d’important, entà totes es edats e gratuïtaments”.
En tractar-se de rotes de mejana e nauta montanha ei obligatòri er usatge de ròba tecnica pr’amor qu’es condicions meteorologiques pòden variar en pògui menuts.