Naut Aran enlumene era glèisa de Sant Andrèu de Salardú entà poder contemplar damb mès atencion aguest majestuós temple religiós e espaci culturau deth municipi.
Era glèisa Sant Andrèu date des sègles XII-XIII e compde damb diuèrsi elements de transicion entre eth gotic e eth romanic. Era sua pentura murau interiora ei des mès ben conservades de tot eth territòri e i destaque era talha deth Crist de Salardú.
Era tinent d’alcalde, Anna Geli, afirme que “era cultura e eth patrimòni supausen ua part importanta dera nòsta accion de govèrn pendent aguesti ans e un exemple n’ei aguest enlumenament dera glèisa Sant Andrèu de Salardú. Des de Naut Aran auem coma objectiu suenhar toti es nòsti espacis e sajar de potenciar-les ath maxim nivèu tà qu’eth nòste municipi pogue esdevier un referent en toti es encastres. Seguim en tot trabalhar entà bastir un Naut Aran milhor entà totes e toti”
Damb aguesta actuacion, er ajuntament refòrce eth sòn compromís damb era cultura deth municipi en tot potenciar-la tà generar naui atractius damb es que poder aportar mès atractius toristics en casa nòsta.
Rebrembam qu’eth campanau ei dejà visitable tanben e s’i destaquen ues vistes espectaculars de diuèrsi punts de Naut Aran.