Er Ajuntament de Naut Aran a impulsat ua accion damb era que pretèn potenciar mès era cultura deth municipi e, especiaument dera poblacion de Salardú, en tot plaçar ua exposicion fotografica a on se trape era pòrta de Salardú.
Aguesta mòstra illustre coma ère ua des entrades principaus ath casc antic e era muralha de Salardú sègles endarrèr. Ath delà, enes imatges, tanben se pòt apreciar d’auti entorns d’aguest endret en epòques mès antigues en tot aportar mès riquesa ara accion. En gèr de 2021 finalizèren es òbres dera pòrta de Salardú dempús de fòrça mesi de trabalh. Aguest element vò escenificar eth que i auie ans endarrèr ena poblacion e convertir-se en un atractiu toristic mès en municipi.
Eth baile de Naut Aran, César Ruiz-Canela, destaque que “pendent aguesta legislatura auem volut potenciar era cultura deth municipi damb fòrça actuacions e aguesta n’ei ua d’eres. Auem assolidat un projècte que vie der an 2021 e s’a dignificat damb eth pas des ans en tot èster un nau referent a visitar en Salardú. Damb un pressupòst fòrça redusit auem executat aguest ahèr damb fòrça eficiéncia”.
Pendent aguesti 4 ans d’ençà dera sua creacion s’a anat acondicionat entà esdevier ua arturada obligatòria de visita entàs persones que s’apròpen en municipi.