Er equip de govèrn der Ajuntament de Naut Aran de Convergéncia Aranesa a impulsat aguest maitin en plen deth consistòri ua mesura entà potenciar era viuenda entà trabalhadors de temporada. En aguest sens, s’a aprovat ua modificacion de Normes Subsidiàries (NNSS) entà cambiar er usatge d’ua parcèla de 1800 mètres quarrats plaçada en Baqueira a equipaments dotacionaus e bastir 60 pisi de 30 mètres quarrats que poderie beneficiar a ues 120 persones.
Era propietat deth terren serie der Ajuntament de Naut Aran mès se prepausarie ua gestion o concession cooperatiua entre empresaris de Baqueira e de Naut Aran entà poder amiar a tèrme endauant eth projècte. Laguens d’aguest futurible espaci i aurie tanben contemplat un complèx entath grop de Pompièrs e Emergéncies de 100 mètres quarrats e un magazèm entara brigada municipau.
Eth baile de Naut Aran, César Ruiz-Canela, destaque que “coneishem era problematica des persones que vien a trabalhar ath nòste municipi e es dificultats entà trapar ua viuenda de loguèr ena que poder residir pendent era sason d’iuèrn sustot, mès tanben entath ostieu. Aguesta accion a coma objectiu acabar damb aguesta situacion e aufrir ua alternatiua a totes aqueres persones que vòlen vier a trabalhar a Naut Aran. Èm un ajuntament que tostemp prenem iniciatiua en toti aguesti airaus, e ac demostram damb hèts.”
Ath delà, ahig que “des de hè ans trabalham entà milhorar era situacion dera viuenda entà familhes, joeni e trabalhadors coma se reflèxe damb eth pis de Garòs, es 6 viuendes dera plaça dera Pica de Salardú, era viuenda de Tredòs o eth macroprojècte de Salardú que tanben contemplarie eth bastiment d’abitatges dotacionaus e entà familhes. Coma digui, aguest ajuntament se definís pes sues accions, non pes sues paraules.”
Aguest punt dera orde deth dia a gessut endauant damb es vòts a favor de Convergéncia Aranesa e Unitat d’Aran e eth vòt en contra d’Aran Amassa. Eth pressupòst totau ascendirie as 5 milions e miei d’èuros e se harie ua concession d’ath torn de 75 ans.