Er Ajuntament de Naut Aran, en commemoracion damb eth passat dia 8 de març, era jornada dera hemna trabalhadora, impulsarà pendent aguest mes de mai ua sèria de talhèrs enfocadi en apoderament femenin e entà destacar era sua figura e potenciar era creativitat entà enaltir es sòns valors en un periòde qu’actuauments contunhe en tot auer-i desigualtats socioeconomiques entre eth genre masculin e eth femenin.
Sus açò, s’haràn quate talhèrs creatius enes que s’haràn composicions, collages, dessenh e estampacion o illustracions en tecniques mixtes. En eri, se cercarà era percepcion deth pensament reflexiu e conéisher es diferenti tipes d’opinion que i a sus aguesta tematica concrèta. Aguestes jornades seràn elaborades per professionaus coma Mónica Revenga, qu’ei era autora d’un projècte collaboratiu sus es hemnes ena antiquitat e era sua importància, qu’a estat invisibilitzada pes mejans de comunicacion.
Eth baile de Naut Aran, César Ruiz-Canela, destaque que “entad aguesta equipa de govèrn an estat tostemp ua prioritat es persones en toti es encastres que podem atier enes nòsti pòbles. Un des nòsti maximoms déuers ei tanben eth de promòir era igualtat laguens dera nòsta pròpria societat. Auem de besonh non auer pòur e afrontar aguestes situacions damb exemples necessaris entà poder amiar a tèrme cambis reaus en futur”.
Es talhèrs s’haràn ena Sala Culturau de Salardú eth 7,8,28 e 29 de mai e son dauridi ara participacion de toti es vesins qu’ac desiren. Se pòden inscríuer gratuïtaments ena pagina web deth consistòri qu’ei www.nautaran.org ena seccion d’anóncis.