Er Ajuntament de Naut Aran finançarà 300 exemplars deth libre “El Régimen Especial de Aran” qu’ei un amàs de dotze estudis juridics independents elaboradi per especialistes ena matèria, dirigidi per Antonio Ezquerra, catedratic de Dret Administratiu dera Universitat de Lhèida damb eth prètzhèt de promòir era realitat aranesa per tota Espanha.
Pendent era jornada deth dimars 26 de noveme se presentèc ena sedença der Institut d’Estudis Aranesi-Acadèmia Aranesa dera Lengua Occitana aguesta publicacion e quini seràn es èishi fonamentaus que compausaràn era accion. Laguens d’aguesta seleccion, es capítols se dividissen en airaus coma per exemple es competéncies deth territòri, eth Conselh Generau, es terçons, eth regim generau deth territòri o d’auti coma per exemple estudis sus era politica e drets lingüistics der aranés, miei ambient o espòrts.
Eth president der Institut d’Estudis Aranesi-Acadèmia Aranesa dera Lengua Occitana, Jèp de Montoya, afirme que “gràcies ar ajut der Ajuntament de Naut Aran, aguesta publicacion aurà ua grana trascendéncia a nivèu academic e administratiu perqué vo mostrar era realitat aranesa e que èm un territòri singular”.
Ath sòn torn, eth baile der Ajuntament de Naut Aran, César Ruiz-Canela, explique que “auem creigut qu’ère fonamentau qu’aguesta publicacion poguesse veir era lum. Toti es juristes d’Espanha auràn accès ad aguest document e poiràn descorbir era realitat d’Aran. Cau tier en compde que molti des grani especialistes d’aguest país non saben qu’auem un regim especiau, ne dilhèu coma foncionen es emergéncies en nòste país o es competéncies as qu’auem dret.
Era prevision deth consistòri ei era de poder presentar aguest libre sus eth regim especiau dera Val d’Aran pendent era primauera en municipi.
