Er Ajuntament de Naut Aran a daurit oficiauments es sollicituds entà auer era possibilitat de víuer en pis de loguèr assequible dera poblacion de Garòs pendent un tèrme de cinc ans atau coma establissen es bases regulades peth pròpri consistòri que sigueren aprovades pera Comission d’Abitatge ena quau se tròben representadi toti es grops politics damb representacion en plen.
Eth pis, plaçat en carrèr Solei numerò 11 de Garòs, ei eth prumèr qu’aufrís era equipa de govèrn e damb eth que preten plaçar ear prumèra pèira deth nomentat parc d’abitatge municipau que projècte er ajuntament. Un viatge finalizat eth procès de sollicituds e autrejat a un particular o familha, eth prètz qu’aurà de pagar per mensualitat era persona o persones que vagen a víuer serà de 450 èuros, despenes apart.
Entre es caracteristiques der abitatge, destaque un ampli salon, ua codina completaments equipada damb acabats de nauta qualitat, un banh complèt, sala de caudères, rentadora e secadora atau coma dues abitacions. Eth sòn prètz en mercat poderie duplicar actuauments e superar aguesta chifra que s’aufrís coma loguèr assequible.
Eth baile de Naut Aran, César Ruiz-Canela, destaque que “èm fòrça contenti de poder anonciar qu’es vesins ja pòden sollicitar víuer en pis de loguèr assequible que projectam en Garòs des der ajuntament. Nosati trabalham entà beneficiar ath maximom as vesins deth nòste municipi en toti es encastres e, er abitatge, ei un des principaus pilars, se non ei eth mès important, que desvoloparam pendent aguesta legislatura. Se tracte deth prumèr des 8 qu’auram en acabar eth 2026 en quau se veiràn beneficiades un gran numerò de persones e familhes”.
Eth periòde de presentacion de sollicituds serà en vigor pendent 20 dies abils des dera publicacion dera convocatòria en Butletin Oficiau dera Província.