Er Ajuntament de Naut Aran seguís damb eth sòn ambiciós plan de poder impulsar eth sòn parc d’abitatge municipau damb era creacion de quate abitatges ena Plaça dera Pica de Salardú damb er objectiu de milhorar era delicada situacion que viuen es vesins deth territòri.
Eth projècte contemple eth bastiment des de zèro de quate abitatges que, dus serien de dus dormitòris e d’auti dus serien de tres dormitòris. Aguestes edificacions aurien entre 75 e 90 m² en foncion d’aguest concrèt nombre d’abitacions. Atau madeish, tanben se projècte qu’ena planta baisha deth blòc se bastisquen 9 places de parcatge.
Eth pressupòst totau dera accion ei de 916.000 èuros, es quaus, s’emplegaràn deth hons qu’a destinat eth consistòri entara creacion d’abitatge assequible e d’autes politiques restacades ad aguesta matèria. Cau rembrembar qu’eth hons a estat creat damb era venta de parcèles ena zòna de Baqueira enes diferenti plans especiaus que s’an anat en tot executar pendent es darrèri ans en aguesta zòna.
Eth baile de Naut Aran, César Ruiz-Canela, destaque que “seguim en tot trabalhar entà melhorar era vida de toti es nòsti vesins en toti es encastres. Er abitatge ei ua matèria fonamentau entà nosati pendent aguesta legislatura e ac demostram damb er abitatge de Garòs, que demoram que a principis d’aguest 2025 ja sigue era familha en tot víuer, era de Tredòs, que en uns mesi començaràn es òbres, e aguestes dera Plaça dera Pica de Salardú. En 2026 auram aufrit 6 abitatges que beneficiaràn a diuèrses familhes deth municipi”.
Pendent aguest 2025 començarien es òbres d’aguesti quate abitatges e nau places de parcatge e era prevision de finalizacion d’accions ei prevista de cara ath 2026. Aguestes s’autrejaràn dera madeisha forna qu’era de Garòs damb ua sèria de critèris objectius qu’establirà ua puntuacion. En aguest moment era accion se tròbe en exposicion publica per un periòde de 30 dies.