Er Ajuntament de Naut Aran impulsarà ua naua e mès modèrna oficina de torisme ena poblacion de Salardú damb eth prètzhèt de poder potenciar aguest airau en municipi e aufrir naues possibilitats, non sonque ad aguesta localitat, mès tanben ara rèsta d’entorns damb es que compde eth territòri.
En totau se destinaràn 208.000 èuros, des quaus, 158.000 èuros provierien deth romanent de tresaureria deth pròpri consistòri e d’auti 50.000 èuros seràn finançadi peth Conselh Generau d’Aran damb un convèni que se signèc damb era maxima institucion politica deth país mesi endarrèr. Aguesta subvencion s’apòrte gràcies ara negociacion de Naut Aran damb aguest organisme entath crubament de part dera taxa toristica que se requècte en municipi.
Eth baile, César Ruiz-Canela, destaque que “damb aguesta naua oficina de torisme auram un major impacte a nivèu toristic e sustot renauiram era imatge actuau qu’auem. Compdaram damb un espaci fòrça nauedós en un lòc emblematic deth pòble coma ei er entorn dera plaça dera Querimònia e èm segurs qu’aguesta accion beneficiarà en gran mesura a tot eth hilat economic deth municipi”.
En d’auti ahèrs, s’a aprovat per unanimitat eth nomentament deth carrèr arquitècte Jaume Raméntol ena poblacion de Garòs.