Er Ajuntament de Naut Aran a definit es bases entà poder optar entara viuenda assequible de Garòs que reforme en aguesti moments eth pròpri consistòri damb eth prètzhèt de plaçar era prumèra pèira deth sòn projècte de parc de viuenda que vò impulsar en municipi.
Cau rebrembar que s’adjudiquèc era reforma integrau dera antiga viuenda des mèstres plaçada ena localitat de Garòs e que compdarà damb 80 m². Era execucion dera òbra compde damb un pressupòst de 65,650,90€ e era prevision ei que pogue èster ua realitat abans d’aguest ostieu. Laguens des accions que s’amien a tèrme per part dera enterpresa adjudicatària ei previst qu’aguest abitatge de loguèr assequible compde damb 1 banh, 2 abitacions, salon, codina, atau coma un petit espaci enta sauvar materiau.
Enes bases, s’establís que cau èster major d’edat, èster empadronat en municipi de Naut Aran abans deth dia 1 de gèr de 2024 e auer uns ingrèssi ena unitat de convivéncia de minim 25.000 èuros ar an. Respècte es punts que se pòden guanhar, se darà un maxim de 25 punts a rason de 1 per an empadronat, es parelhes qu’an mainadèra, 2 per cada hilh, 2 punts es familhes monoparentals, 1 punt per discapacitat non inferior 33%, 2 punts per percentatge non inferior d’un 66% de discapacitat, 2 punts es persones empradronades en Garòs, 2 punts es persones que trabalhen en Garòs e 1 punt era gent que trabalhe en Naut Aran.
Eth baile deth consistòri, César Ruiz-Canela destaque que “aguestes òbres de reforma en Garòs supausen un prumèr pas entà auer un parc de viuenda assequible pròpri en nòste municipi damb er objectiu que familhes o vesins poguen víuer en municipi a un prètz inferior a çò que se ve ara madeish en mercat”.
Eth prètz deth loguèr d’aguest abitatge assequible de Garòs de dus dormitòris serà de 450 € ath mes e poderie esdevier ua realitat a darreries deth mes d’agost un viatge s’autrège era viuenda ath vesin o vesia guanhador d’aguest concors public. Eth periòde de loguèr aurà ua durada maxima de 5 ans e non se poderà especular ne logar a tresaus.