Er Ajuntament de Naut Aran, amassa damb era estacion d’esquí de Baqueira/Beret e Torisme Val d’Aran acuelheràn, eth pròplèu 26 de març, era gravacion d’un videoclip collectiu entà hèr un aumenatge ath líder de Jarabe de Palo, Pau Donés.
A trauès d’aguest acte, s’amiarà a tèrme era gravacion d’un video musicau sus era nhèu en Pla de Beret ena estacion d’esquí de Baqueira, ena que se pretèn amassar a centeats de musics e admiradors der artista entà interpretar de manèra collectiva ua des sues cançons mès significatives, “GRITA”.
Era idèa sorgic a mejans deth darrèr mes de mai, quan, er organizador principau der eveniment e music zamoran, Mario Carnero, contactèc damb er Ajuntament de Naut Aran e concrètaments damb eth sòn baile, César Ruiz-Canela, entà hèr un acte restacat ara figura de Donés. Cau destacar que des de hège diuèrsi mesi eth consistòri auie era intencion de hèr un reconeishement pòstum oficiau ath cantautor.
MEXICO CITY, MEXICO – OCTOBER 24: Singer Pau Dones of Jarabe de Palo performs onstage at Centro Cultural Roberto Cantoral in Mexico City on October 24, 2012 in Mexico City, Mexico. (Photo by Victor Chavez/WireImage)
Damb era immediata aprobacion des de Naut Aran, es convèrses anèren de forma fòrça rapida enquia arribar a Baqueira-Beret e Torisme Val d’Aran a on tanben se celebrèc era idèa e se somèren ath projècte. Eth baile Ruiz-Canela, explique que “ei fòrça important que totes es institucions vagen tara madeisha direccion en un eveniment d’aguestes caracteristiques que cerque aumenatjar era grana trajectòria e figura de Pau Donés, persona qu’estimaue eth nòste territòri e que per açò auie era sua residéncia ena poblacion de Bagergue”
Eth promotor dera idèa, eth music zamoran Mario Carnero, apassionat dera val e des sues montanhes, insistís en que se tracte d’un aumenatge daurit a tota persona que volgue participar: “volem qu’es votzes e estruments musicaus s’escoten enes montanhes que Pau tant estimaue, e que siguen testimònis d’un acte unic en sòn rebrembe”.
Entà anar tà Beret a gaudir dera natura mès pura e participar d’aguesta experiéncia musicau ath madeish viatge que se rendís aumenatge en Pau Donés e era sua forma de compréner era vida en aguestes montanhes, cau inscriuer-se de manèra gratuïta ena web der eveniment: www.elvallegrita.org, a on se pòt trobar era basa musicau que s’utilizarà coma referéncia entà qu’es musics e cantaires assistents poguen hèr era sua interpretacion.
Fin finau, eth baile César Ruiz-Canela a manifestat que “volem arregraïr d’ua forma molt clara que Baqueira Beret age facilitat es recorsi de besonh entà que se pogue amiar a tèrme aguest preciós acte. Credem que serà un eveniment unic e que darà valor ara vida que reclamaue Pau Donés a on eth sòn lèma ère que Víuer ei urgent”..