Era poblacion aranesa d’Arties, a estat reconeishuda aguest maitin en Cambrils damb era certificacion de “Poble amb Encant” per part dera Agéncia Catalana de Torisme. D’aguesta forma, s’unís damb d’auti 13 pòbles que dejà compdauen damb aguesta distincions: Beget, Calella de Palafrugell, Castellar de n’Hug, Montclar, Montsonís, Mura, Peratallada, Pals, Prades, Rupit, Santa PAu, Siurana e Taüll.
Er acte s’a oficializat aué a traués dera plataforma de Youtube pr’amor qu’era crisi sanitària deth coronavirus non permet hèr actes en qué se poguen amassar un gran corròp de persones.
Eth director generau de Torisme, Octavi Bono, qu’a participat enes parlaments iniciaus, a arregraït era doble contribucion que hèn aguesti municipis “entà un milhor posicionament dera vòsta realitat e estimular era demanda e per valoritzar tot eth territòri e eth nòste sector”. Bono a explicat que “aguesti municipis son era milhor representacion possible de çò que pòt aufrir eth territòri catalàn, compden damb un patrimòni culturau, naturau e paisagistic abondiu e singular e aufrissen infinitat de possibilitats ath turista”.
En aguest sens, d’Arties s’an destacat es sòn amplis espacis naturaus coma eth Lac de Mar o er ascens ath mitic Montarto, era sua cultura coma poderien èster es hèstes deth huec que son Patrimòni Immateriau pera UÇNESCO, o era sua grana ofèrta de patrimòni gastronomia, oci e espòrts.
Era bailessa d’Arties, Lina Fanlo, valoraue réber aguesta distincion de forma fòrça positiva en tot explicar que “ei ua grana forma de contunhar promocionant era nòsta poblacion e plaçar Arties laguens deth mapa toristic de Catalonha. Credem qu’ei ua grana oportunitat entà revitalizar encara mès era nòsta economia.”
Ath delà dera certificacion de “Pobles amb Encant” tanben s’a premiat Caldes de Malavella coma “Ciutat amb Caràcter” e l’Estartit, Cambrils, l’Ampolla, e eth barri deth Serrallo de Tarragona coma naui “Barris i Viles Marineres”.
Er Ajuntament de Naut Aran a celebrat era decision dera Agéncia Catalana de Torisme d’escuélher un des sòns emplaçaments deth sòn municipi entà aguesta distincion e an afirmat que contunharàn apostant pera obtencion de futures certificacions que milhoren era visibilitat des sòns pòbles.