Er Ajuntament de Naut Aran a organizat un dispositiu especiau entàs eleccions catalanes deth dimenge 14 d’hereuèr entà esvitar ath maximum eth risc de contagi per coronavirus.
En aguest sens, s’abilitaràn dus emplaçaments de votacion: un en centre poliesportiu de Salardú, a on votaràn es vesins de Tredòs, Bagergue, Unha, Salardú, Gessa e Baqueira; e un aute ena sala sociau d’Arties, ena que votaràn es empadronats en Arties e Garòs.
Concrètament, en Arties, era entrada entà votar serà pera pòrta d’accès der Ajuntament dera EMD d’Arties e era gessuda pera sala sociau entà assegurar-se que cap persona se pogue crozar damb ua auta pendent eth trajècte. Laguens deth recinte, poderà auer-i un maximum de dues persones en tot votar exceptuant es casi que siguen d’ua madeisha bombolha familhara.
Ath delà, en Salardú, s’entrarà per accès principau dera sala poliesportiua e se gesserà pera part posteriora que da accès ara piscina. Er aforament maximum en aguest cas serà de tres persones, a excepcion de casi de bombolhes familhares, e se seguirà un recorregut mercat enquia arribar enes urnes coma tanben succedirà en Arties.
Enes dus centres electoraus, era entrada la regularà un vigiliant municipau. Tanben, se disposarà de gèu idroalcoolic, mascaretes e d’auti elements de proteccion finançat integraument per Ajuntament de Naut Aran entà garantir era seguretat des votants e responsables des taules. En aguest sens, eth consistòri tanben a crompat uns monos de proteccion entath president e es vocaus que seràn pendent tot eth dia ena sedença de votacion.
Eth baile de Naut Aran, Cesar Ruiz-Canela, concrète que “mos cau velhar pera seguretat de toti es nòsti vesins e tanben pes tres persones que seràn tant en poliesportiu de Salardú coma era sala sociau d’Arties. Damb aguestes mesures, volem minimizar eth risc de contagi per coronavirus”.
Atau madeish, tanben a destacat que “se ventilaran toti dus espacis cada ora entà contunhar baishant eth risc e, sustot, se desinfectarà er espaci de forma exaustiva abans e dempús des votacions”,
Fin finau, er ajuntament, a abilitat un servici entà cadun des membres dera taula entà que non les calgue coïncidir er un madeish espaci sanitari e les pagarà er esdejoar e eth minjar coma pòrte hènt deja diuèrsi ans.