Er Ajuntament de Naut Aran a començat es òbres dera reforma integrau des vestiaris dera Sala Polivalenta plaçada ena poblacion de Salardú. Dempús de demorar desèrt est an passat pera pujada des prètzi des materiaus de bastiment, ara a tornat a gésser publicaments eth projècte entà que bèra enterpresa podesse assumir era sua execucion. En aguesta escadença, eth procès administratiu s’a resolvut de manèra favorabla e, donques, s’an pogut amiar a tèrme es accions enfocades a milhorar era vida des vesins de Naut Aran e d’auti visitants.
En aguest sens, laguens deth renauiment des vestuaris ei contemplada era creacion d’un nau banh entàs hemnes atau coma eth renauiment integrau des diferenti elements deth pròpri complèxe. S’actuarà en ua superfícia de 100 m² damb un pressupòst totau de 90.000 èuros.
Eth baile der Ajuntament de Naut Aran, César Ruiz-Canela, destaque que “aguesta reforma integrau des vestiaris supause era fasa definitiva d’aguestes òbres generaus qu’auem amiat a tèrme ena Sala Polivalenta, a on tanben auiem hèt ua impermeabilizacion deth tèt, repintar era pista e traçar naues linhes de jòc, pintar er exterior, trèir er arc deth miei exterior, entre autes accions. Pensi qu’es vesins e persones que mos visiten poderàn gaudir d’ua installacion fòrça mès modèrna e adaptada as sòns besonhs.”
Eth consistòri a iniciat es òbres aguesta madeisha setmana e es trabalhs s’alongarien ath torn de dus mesi.