Er Ajuntament de Naut Aran a pogut inaugurar aguest maitin eth Skate Park dera poblacion d’Arties dempús de 10 dies de trabalhs enes que s’an pogut profitar es bones condicions meteorologiques entà hèr es trabalhs de hormigon entath solèr e de pentura des elements d’aguesta installacion.
Rebrembam qu’eth consistòri aprovèc eth mes de març passat deth 2021 era creacion d’un complèxe de 506m2 fòrça complèt e adaptat entà toti es nivèus qu’ère ère contemplada era installacion d’un ‘bowl’, comunament nomentada piscina, e d’auti elements coma un ‘croissant’, ‘quartièr slappy’, ‘wobblecano’, ‘europad’, eca. Un còp finalizades es accions, se confirme aguest d’Arties coma eth prumèr Skate Park de granes caracteristiques qu’aurà era Val d’Aran pr’amor que, actuauments, sonue i a ua petita rampa ena poblacion de Vielha.
En totau, s’an destinat 165.000 èuros ath bastiment d’aguest espaci fòrça demandat pera comunitat ‘skater’ e patinadora deth territòri e que demorauen damb fòrça d’entosiasme era fin des òbres entà poder començar a gaudir deth nau equipament municipau.
En aguest sens, eth baile de Naut Aran, César Ruiz-Canela afirme que “m’agradarie destacar qu’aguest projècte ei ua realitat gràcies as peticions des vesins que mos hèren a trauès des hilats sociaus mesi endarrèr. Entre era professionalitat dera enterpresa constructora eth sòn assessorament personau, auem creat un Skate Park de grana qualitat e que segur qu’atrè non sonque as vesins d’Aran, mès tanben a visitants d’autes regions.”
Un viatge finalizat eth Skate Park, des der Ajuntament de Naut Aran s’avalòre coma fòrça positivaments era sinergia que crearà aguesta naua installacion, amassa damb eth Pump Track que pòrte en foncionament des deth passat ostieu. Eth consistòri s’a convertit en ua referéncia ena obtencion de naui atractius esportius que permeteràn desestacionalizar d’ua forma mès clara eth municipi enes sasons que non i age tanti visitants ena zòna.
