Er Ajuntament de Naut Aran realizarà un estudi de viabilitat entara creacion d’un Skate Park a 200 mètres dera centrau idroelectrica dera poblacion d’Arties. En totau, se profitarien 500m2 de superfície, que se destinarien principauments ara creacion d’un ‘Bowl’ de gondron (colloquiauments dit piscina), en qué tant ‘skaters’ expèrts, auançadi o iniciadi poderàn gaudir dera practica d’aguest espòrt. Dera madeisha manèra, tanben se contemple era incorporacion de d’auti elements que poguen ajudar a hèr mès versàtil aguesta futura installacion.
Aguesta accion se prepause pes desenes de peticions qu’an arribat a trauès des hilats sociaus deth consistòri dera comunitat ‘skate’, que sollicitauen un equipament d’aguestes caracteristiques en territòri.
En aguest sens, eth baile de Naut Aran, Cesar Ruiz-Canela, destaque que “ei fòrça important qu’un ajuntament escote es idèes e opinions des sòns vesins. Arribèrem a auer mès de 60 messatges en tot felicitar-mos per anterior projècte que prepausèrem, eth ‘Pump Track’, mès mos explicauen que damb un Skate Park serie eth complement perfècte”.
Ath delà, especifique que “dempús d’estudià’c detengudament pendent eth darrèr mes e miei, credem que pòt èster ua grana opcion entà combinar damb eth traçat deth ‘Pump Track’ que se bastirà era pròplèu primauera e que mos aportarà un atractiu toristic mès entath municipi”.
Er estudi contemplarà eth bastiment d’aguesta installacion mejançant gondron pr’amor qu’ei era melhor tecnica que se pòt utilizar entà modelar aguest tipe de recintes esportius. S’a priorizat aguesta opcion abans que hè’c de husta, hèr o hormigon pera durabilitat deth materiau.
Damb aguest futurible equipament, er Ajuntament de Naut Aran contunhe damb era linha d’apostar pes inversions entà desestacionalizar eth territòri dera Val d’Aran, atau coma de crear un hilat esportiu que promòigue es abits saludables.