Eth Plen der Ajuntament de Naut Aran a aprovat damb es vòts a favor de Convergéncia Aranesa e es abstencions des grops d’Unitat d’Aran e Aran Amassa ua modificacion pressupostària de 621.000 èuros que milhorarà diuèrsi aspèctes sociaus deth municipi.
Sus açò, en destaquen diuèrses partides. Ua d’eres ei er apraiament des murs der arriu Valarties per valor de 115.000 èuros. Aguesta accion a ua grana importància entath consistòri pr’amor que hège 6 ans que se demanauen es pertinenti permisi entà amiar a tèrme era accion. Ath delà, se milhorarà eth sistèma d’aigües potables de Naut Aran per valor de 125.000 èuros e era captacion der arriu Malo per 56.000 èuros.
Un des projèctes de futur entà poder desestacionalizar eth territòri ei era creacion de dues rotes de BTT enfocades entà tota era familha e qu’anarie des deth telesèra deth Bosque de Baqueira enquia arribar ena zòna deth Clòt der Os, en Beret. Er objectiu ei eth de hèr ua rota entà poder visitar es lacs d’aguesta zòna que genèren un gran atractiu entre es persones que hèn senderisme en Aran en ostieu. Entà amiar a tèrme era adeqüacion d’aguesta via, se destinarien un totau de 25.000 èuros. Era enterpresa Baqueira Beret s’encuedarie deth manteniment d’aguest nau reclam.
Eth baile de Naut Aran, César Ruiz-Canela, destaque que “des deth consistòri portam diuèrsi ans en tot apostar per projèctes que poguen desestacionalizar eth nòste territòri. En nòste cas, auem apostat clarament peth sector esportiu e mos auem convertit en referent deth Pirenèu. Auem un Pump Track, vies herrades, un futur Skate Park, e ara volem potenciar ua activitat ar aire liure entà tota era familha e que permete gaudir ath maximom des nòsti entorns”.
Ath delà, er Ajuntament de Naut Aran tornarà a méter ara venda ua finca deth plan especiau numèro 2 plaçada a Baqueira entà poder crear mès abitatge sociau. Aguesta mesura a gessut endauant damb es vòts a favor de Convergéncia Aranesa e Unitat d’Aran e era abstencion d’Aran Amassa.
Eth Plen a aprovat tanben mocions en contra dera guèrra entre Ucraïna e Russia, en favor deth dia dera hemna trabalhadora, pera exclusion financèra des persones majors e ua auta entà aufrir supòrt ath sector agrari.