Er Ajuntament de Naut Aran a hèt oficiaus es bases entà sollicitar es ajudes restacades damb era COVID-19 en municipi de Naut Aran entàs negòcis que tributen en aguest parçan e professionaus autonòms atau coma entàs familhes vulnerables.
En aguest sens, eth consistòri destinarà un totau de 200.000 èuros que seràn repartidi en 180.000 èuros en subvencions entà ajudar as negòcis locaus deth municipi e ua auta de 20.000 èuros entàs persones damb risc de vulnerabilitat entà finançar còsti coma impòsti municipaus, loguèr d’abitatge e pagament d’ipotèca.
Concrètaments, entà accedir ath hons d’ajudes des familhes damb mès besonh, se precisarà un informe tecnic des servicis sociaus deth Conselh Generau d’Aran. Un còp especificat que se forme part d’aguest collectiu s’aufrirà era aportacion pendent un periòde de tres mesi. Dempús d’aguest periòde, se tornarà a sollicitar un aute informe as servicis sociaus deth govèrn aranés que determinaràn se son encara de besonh o non.
Eth baile de Naut Aran, César Ruiz-Canela, destaque que “sense dobte, es familhes que son mès aprop deth lindau de praubesa an vist redusides es sues possibilitats de generar ingrèssi e se tròben en ua situacion mès complèxa. Auiem de besonh d’actuar entà palliar aguesta situacion”.
Atau madeish, es ajudes COVID-19 tanben contemplen ua partida de 180.000 èuros qu’anarà destinada as negòcis locaus e autonòms que non lo dispòsen. En aguest sens, es mès beneficiadi seràn es proprietaris d’un locau pr’amor que crubaràn eth 100% dera ajuda establida. Ath sòn torn, es autonòms sense sedença, arreceberàn un 30% deth totau que se destine entàs establiments.
Entà auer accès ad aguesta subvencion, es persones qu’agen locaus que tributen en municipi auràn de besonh de presentar eth darrèr rebut der IBI pagat en an 2020 e es que non an locau, eth rebut deth pagament d’autonòms deth passat mes de març de 2021.
Es ajudes se poiràn sollicitar mejançant ua instància enquiath pròplèu 10 de junh.