Er Ajuntament de Naut Aran a finalizat oficiauments eth periòde entà sollicitar era possibilitat de víuer en pis de loguèr assequible dera poblacion de Garòs pendent un tèrme de cinc ans atau coma establien es bases regulades peth pròpri consistòri que sigueren aprovades pera Comission d’Abitatge, ena que se tròben representadi toti es grops politics damb representacion en plen.
Eth pis, plaçat en carrèr Solei numèro 11 de Garòs, ei eth prumèr qu’a aufrit era equipa de govèrn e damb eth que preten méter era prumèra pèira deth nomentat parc d’abitatge municipau que projècte er ajuntament. Un viatge finalizat eth procès de sollicituds e autrejat a un particular o familha, eth prètz qu’aurà de pagar per mensualitat era persona o persones serà de 450€, despenes a part.
En totau, s’an presentat 12 sollicituds per part de vesins deth municipi de Naut Aran. Pendent era setmana que vie s’amassarà era Comission d’Abitatge entà hèr era ponderacion de cadun des casi e se resolverà parciauments era que serà era candidatura guanhadora deth prumèr abitatge de loguèr assequible ena zòna. Era prevision deth consistòri ei que, pendent eth mes de junh, ja pogue víuer ua familha en eth.
Eth baile, César Ruiz-Canela, destaque que “èm fòrça erosi que i age auut aguest numerò de sollicituds pr’amor que demòstre que manque abitatge de loguèr assequible. Trabalham de forma activa en aguest ahèr e eth nòste objectiu ei, pendent es tres ans que vieràn, impulsar enquia 30 abitatges de loguèr assequible entre es diuèrsi projèctes qu’amiaram a tèrme.”
Entre es caracteristiques der abitatge de Garòs, destaque un ampli salon, ua codina completaments equipada damb acabadi de nauta qualitat, un banh complèt, sala de caudères, atau coma dues abitacions, entre d’auti. Eth sòn prètz en mercat poderie duplicar actuauments o superar aguesta chifra que s’aufrís coma loguèr assequible.