Er Ajuntament de Naut Aran e era Entitat Municipau Descentralizada d’Arties e Garòs heren un aumenatge era net deth 28 d’agost ara que siguec responsable dera poblacion de Garòs pendent 16 ans, Maria Àngels Ordax, pera sua grana labor amiada a tèrme ena gestion d’aguest pòble, solucionar es problèmes que sorgien diaderaments, atau coma contribuïr en auanç dera EMD tant en Garòs coma Arties.
Ordax, ath long de toti aguesti ans, a format part de diferenti equips de govèrn en tot collaborar damb es anteriors presidents dera EMD coma son Lina Fanlo, David Torres e Josep Canut pendent es 16 ans qu’a estat escuelhuda pes vesins entà que les podesse representar.
Eth baile de Naut Aran, César Ruiz-Canela, destaque que “non i a auut un melhor dia entà scenificar aguest aumenatge qu’ena hèsta de Sant Julià, patron de Garòs, dauant de toti es vesins as qu’a servit pendent dia e net sense descans e tostemp en tot cercar eth ben desinteressat. Èster pendent 16 ans en tot aufrir un servici public ei un trabalh intens e qu’a vist sense cap genre de dobtes es sòns fruts tant en Garòs coma Arties. Voi arregraïr publicaments en nòm der Ajuntament de Naut Aran e de totes es persones que formen part d’aguest consistòri er incansable trabalh qu’a amiat a tèrme Maria Àngels Ordax”.
Ena placa commemorativa liurada ager madeish ditz “Era EMD d’Arties e Garòs e er Ajuntament de Naut Aran autregen aguesta placa commemoratiua a Maria Àngels Ordax Gutiérrez peth sòn compromís e incansable trabalh peth benèster des sòns vesins e er auanç deth municipi”. Aguesta reconeishença siguec liurada peth pròpri baile municipau, atau coma era presidenta d’Arties e Garòs, Lina Fanlo.