Aguest fin de setmana torne eth Salardú Country Ròck Festival, un des eveniments mès espectaculars a nivèu socioculturau que se pòden veir ena Val d’Aran ath long de tot er an. En aguest sens, eth hestau se harà des dies 22 ath 25 en un ambient espectacular e damb eth prètzhèt d’apropar-se ath maximom a un autentic panorama american.
Per çò qu’ei dera aufèrta de concèrts, n’i aurà fòrça, en tot destacar es de River Town Saints, Tam tam go, Emily Ann Roberts, Kinsey Rose o Craig Campbell, qu’aumplissen places e espacis aquiu a on van e se convertiràn enes grani atractius a nivèu internacionau pr’amor bèth un d’eri serà eth prumèr viatge que tòquen en Euròpa. Dera madeisha manèra, i aurà workshops enes que tanben se compdarà damb es milhors coreografs dera scèna europèa, ua hèira restacada ar ambient american, ua zòna de restauracion e eth darrèr dia un espectacle de mariachis.
Tà Victor Manuel Rodríguez, director deth Salardú Country Rock Festival, aguest eveniment “ei lèu sense cap tipe de dobte er acte non esportiu que mès persones amasse ena Val d’Aran e aquerò lo convertís en ua referéncia en nòste territòri ena sua 9au edicion, un succès categoric”.
Ath Salardú Country Ròck Hestivau vieràn persones arribades des païsi nordics, Argentina, eth Brasil, es Estats Units o gent d’Australia. Era prevision ei que se pogue superar es 8000 persones pendent aguesti dies en eveniment, en tot auer coma referéncia es 12.000 persones que s’artenhec ans endarrèr.