Talhèrs Dia Internacionau des Hemnes – Ajuntament de Naut Aran. Mai 2022
- Illustracion en tecniques mixtes 1
Com s’interactuen es materiaus entre eri? Qué succedís s’amassam diuèrses tecniques en ua madeisha illustracion?
En aguest talhèr de tecniques mixtes apreneram a experimentar damb es materiaus qu’auem en nòste poder e crearam ua bibliotèca de recursi pictorics, tecniques, experimentacion e processi qu’ajudaràn a cada alumne a deishar anar era man e pérder era pòur ara huelha en blanc.
Veiram es possibilitats de materiaus coma es aquarèles, lapitzes de colors, rotuladors o cères e experimentaram, pas a pas, qué passe quan amassam aguestes tecniques o cambiam es eirines qu’emplegam que normaument entà aplicar-les.
Ena part finau deth talhèr, cada alumne s’emportarà era sua pròpria “bibliotèca” de tecniques e resultats qu’auram artenhut e que, mès tarde, le poirà hèr a servir entà crear es sues pròpries illustracions.
En aguestes jornades trabalharam en clau feminista. Partiram deth concèpte dempús deth libre collaboratiu “Tostemp èrem aciu, Tostemp siguèrem guerrères” entà mostrar eth procès creatiu des sues illustracions e aufrir es claus entà que cada assistent pogue crear era sua pròpria guerrèra a trauès des diuèrses tecniques mixtes prepausades.
MATERIAUS QU’AN D’APORTAR ES ASSISTENTS: Papèr d’aquarèla (o sketchbook), estalhants, pegament, lapitz e materiaus de diboish qu’agen per casa (aquarèles, acrilics, pentures, cères, pinzèus, grafits, etc)
7 de mai tàs 17 ores (durada 2:30)
- Illustracion en tecniques mixtes 2
Gràcies ad aguest talhèr, es participaires apreneràn a resòlver concèptes mejançant prepauses grafiques que s’aluenhen des lòcs comuns. Gessent des enonciats “diboisha un paisatge montanhós” e “diboisha ua silueta masculina e femenina” exploraram coma d’arraïtzats son diuèrses formes e solucions grafiques damb es esteotips sociaus.
Damb es resultats deth prumèr exercici analisats, se prepausaràn enonciats entà resòlver damb tecniques especifiques. Seràn exercicis cuèrti e divertits que mos permeteràn jogar. Eth prètzhèt ei era experimentacion des tecniques e apréner a actuar des de diuèrses perspectives aguesti concèptes visuaus.
Fin finau, trasladaram aguest aprenentatge ara creacion de illustracion digirau. S’explicaràn es metòdes principaus entà digitalizar e reprodusir correctament ua imatge (forografia, escanejat….) e quaques des formes entà preparar es tòns trabalh entà aquerò.
Ath delà, veiram programes emplegats en illustracion digitau, es sues diferéncies e eirines principaus. Aportaram pautes entà iniciar as participaires en aguest mon e explicar qu’era illustracion digitau ei ua tecnica mès, non consistís en replicar er art plastic.
Damb aguest talhèr artenheràs crear un estil personau entàs tues illustracions, introdusiràs diuèrses tecniques en tòn trabalh, perderàs era pòur a diboishar damb er ordenador e apreneràs a reprodusir eth tòn trabalh entara sua venda o exposicion.
En aguestes jornades trabalharam en clau feminista. Partiram deth concèpte des deth libre collaboratiu “Tostemp èrem aciu, Tostemp siguerem guerrères” entà mostrar eth procès creatiu des sues illustracions e aufrir es claus entà que cada assistent pogue crear era sua pròpria guerrèra a trauès des diuèrses tecniques mixtes e digitaus prepauses.
MATERIAUS QU’AN D’APORTAR ES ASSISTENTS: Lapitzes, pegament, revistes e materiaus de diboish
8 de mai tàs 11 ores (durada 2:30)
- Composicion e collage sense saber diboishar
Com aprenen es artistes a hèr granes òbres d’art? Donques se comènce atau. Abans d’iniciar un brolhon a lapitz, auem de visualizar qu’ei çò que vam a retratar, e qué vam a comunicar damb aquera imatge. Sigue o non cercada, tot comunique.
Era composicion e er enquadrament son es mistèris dera armonia des grani classics, e tanben des òbres actuaus. Conéisher aqueth lenguatge e botjar-l a voluntat, ei quauquarren que non fòrça dominen. Totun, en un mon a on era imatge a un valor sus era paraula, auem de besonh hèc nòste, analisar çò que d’auti comuniquen e saber qué mos sagen de transméter tan de forma literal coma subliminau.
Hèr collages damb elements descubèrti ei un entrenament e activitat fòrça gratificanta dera madeisha forma que terapeutica que mos ajude a compréner milhor coma funcionen e interactuen entre eri madeishi toti aguesti elements.
En aguest talhèr tot servís. Es assistents apreneràn a deishar anar, talhar, plaçar, traçar e experimentar sense pòur. Eth collage ei ua eirina ludica en que reciclam materiaus e ath madeish viatge les i dam un nau sentit en tot interiorizar nocions de composicion, especialitat, textura e simbologia deth color.
En aguestes jornades trabalharam en clau feminista. En qué consistís eth feminisme? Com mos servís ena nòsta quotidianitat? Quini valors prepause e coma pòt milhorar es nòstes relacions sociaus e afectives? Emplegaram es eirines que mos proporcione eth mon deth collage entà experimentar e transméter emocions e sensacions a trauès de eth.
MATERIAUS QUE PÒDEN APORTAR ES ASSISTENTS: Revistes, postaus, enciclopèdies vielhes… Estalhants, pegament, lapitzes, pentures, hius…
28 de mai tàs 17:30 ores (durada 1:30)
- Dessenh e estampacion de ‘patterns’ analogics
Milenats d’ans d’istòria dera comunicacion visuau mos an portat enquias nòsti dies a sarrar un boton e que gesquen centeats de còpies dera boca dera impresora a color, mès, com se comunicaue tot eth mon abans dera electricitat?
En aguest talhèr veiram un repàs rapid pera istòria dera impresion e era reproduccion de imatges e tèxti entara difusion de coneishements, notícies e eveniments.
Profitaram es naui materiaus qu’auram ena actualitat enlòc des dificiles tecniques des expèrts e expèrtes entà dar lòc a un (o diuèrsi) estampats entath papèr de present.
Emplegaram estalhants, gubies e d’autes eirines damb puncha sus materiau bland e facil de talhar per çò qu’es assistents auràn d’auer fòrça compde entà dar lòc ara sua òbra mèstra.
Mos fixaram ena geometria abstracta e en quaque estils preexistents entà dessenhar cada sagèth, atau coma compartir-les damb era rèsta d’assistents e hèr ua colleccion d’estampats en grop.
En aguestes jornades trabalharam en clau feminista. Quini valors prepause e com pòt milhorar es nòstes relacions sociaus e afectives? Emplegaram era abstraccion entà talhar en sagèths concèptes que mos rebremben es objectius deth feminisme, que non son mès que cercar ua societat mès justa e igualitària en drèts entà totes es identitats existentes.
MATERIAUS QUE PÒDEN APORTAR ES ASSISTENTS: Davantau, ròba que se pogue enlordir, papèr de diari, papèr e lapitzes.
29 de mai tàs 11:00 ores (durada 1:30)
Inscripcions: ei obligatòri realizar ua inscripcion per auança, s’a d’aumplir eth següent formulari e enviar-lo ar Ajuntament de Naut Aran mejançant ua instància generica dera sedença electronica.
Tràmit dera sollicitut: instància Generica Naut Aran
