Dempús dera excellenta acuelhuda qu’aueren es dues jornada deth cicle d’accion sociau der Ajuntament de Naut Aran damb ua conferéncia de Fran Rojas nomentada “Entendre l’adolescència per saber com educar” e damb era collaboracion d’Amentaran e eth talhèr d’educacion sexuau tàs familhes a cargue de Silvia Catalán, ara arribe ua tresau session laguens d’aguest cicle a cargue de Marc Masip damb ua doble conferéncia. Serà deman dimars dia 12 de noveme entàs 16:00 e es 18:00 dera tarde ena Sala Culturau de Salardú.
Era prumèra, qu’ei dirigida entàs adolescents, se nomente “Ac vòs provar tot” e tracte sus eth consum de substàncies e a coma objectiu informar as joeni sus aguesta qüestion damb es principaus perjudicis que represente. Ath delà, e enfocat entàs familhes, s’harà ua conferéncia sus era adiccion as naues tecnologies damb eth nòm de “Era eroïna deth sègle XX”. Aguesta accion s’aufrís de forma gratuïta per Ajuntament de Naut Aran damb eth prètzhèt d’informar a toti dus collectius sus es risqui que i existissen actuauments ena societat.
Era tinent d’alcalde e còsso d’accion sociau deth consistòri, Anna Geli, destaque que “aguest cicle d’accion sociau respon a ua demana des pairs e mairs deth municipi pr’amor qu’an fòrça preocupacions damb es ahèrs vinculadi ara joenessa e a quedat demostrat damb es anteriores conferéncies qu’aguesti collòquis son tot un succès e an un motiu tà hèr-se. Aguest ajuntament tostemp apostarà per potenciar es ahèrs sociaus en municipi.”
Eth consistòri seguirà ena recerca de mès accions sociaus que poguen potenciar es abituds saludables entre es joeni deth municipi e es relacions familhars.