Er Ajuntament de Naut Aran pòrte fòrça ans en tot pensar solucions ara problematica des veïculs de mès de 5 mètres e es autocaravanes en municipi. S’an amiat a tèrme diuèrses accions provisionaus entà solventar milhor forma aguesta situacion mès non ei pro. Ara, eth consistòri a iniciat ua accion entà que, quinsevolh vesin interessat, pogue cedir o véner era sua finca de finalitat rustica o urbanizable entà qu’es autocaravanes e veïculs de mès de 5 mètres poguen estacionar o pernoctar.
Cau rebrembar qu’era lei indique que s’es finques son de caractèr rustic coma molt se pòt estacionar pendent un periòde de 48 ores de forma rotacionau e se son urbanes poderien pernoctar sense cap problèma. Er ajuntament prepause era crompra o eth loguèr damb posterior concors public entà poder generar ua solucion ath volum d’autocaravanes e veïculs de mès de 5 mètres qu’arriben ath municipi sustot ena sason d’iuèrn.
Es requisits qu’an de complir es finques son, per exemple, qu’auràn d’auer ua pendent arribenta inferior ath 20%, que non agen problèmes d’inundabilitat, lauègi o d’auti risqui geologics e aurà de compdar damb un accès rodat adequat que pogue perméter era circulacion de veïculs, en tot inclodir es madeishes autocaravanes o d’auti de mès de 5 mètres.
Es vesins que siguen interessadi en logar o véner es sues finques ar ajuntament, auràn de meter-se en contacte damb eth pròpri consistòri entà amiar endauant era gestion apertienta. Entre es finques candidates s’amiarà a tèrme un procès d’avaloracion entà verificar que complisquen damb es critèris establidi e iniciar eth tramit corresponent.
Eth baile der Ajuntament de Naut Aran, César Ruiz-Canela, destaque que “tostemp sajam de cercar solucions a totes es problematiques e situacions que viu eth nòste municipi. Eth transit de veïculs de mès de 5 mètres n’ei ua e portam dejà ans en tot cercar ua solucion. Ara auem pensat en aguesta idèa que demorem i age bèth vesin interessat tà logar o véner era sua finca entà qu’açò sigue ua realitat”.