Er Ajuntament de Naut Aran auance entà un futur a on es energies renauïbles seràn eth centre des politiques en tot voler contribuïr entà redusir era peada de carbòni e generar naues oportunitats energetiques de futur entàs diuèrsi equipaments municipaus.
Ei atau coma, aguest maitin, s’a aprovat en plen deth consistòri de forma provisionau era modificacion des normes subsidiàries (NNSS) entath bastiment deth district heating de Naut Aran. Cau rebrembar qu’entara execucion d’aguest projècte, eth consistòri compde damb ua subvencion de 738.000 èuros per part des hons Next Generation dera Union Europèa. Aguest tramit permeterà ath consistòri crear un emplaçament entara brigada autant coma era sala de caudères a on pogue foncionar era biomassa.
Eth baile der Ajuntament de Naut Aran, César Ruiz-Canela, destaque que “gràcies ara biomassa poiram cauhar diuèrsi equipaments publics coma per exemple pòt èster era Sala Polivalenta de Salardú, era escòla Ruda, era piscina o eth pròpri consistòri. Era transicion as energies verdes, sostenibles e renauïbles ei un pas qu’auem d’amiar endauant coma ajuntament e ei fonamentau en sègle XXI”.
Ath delà, tanben s’a aprovat per unanimitat es plecs de clausules tecniques e administratives deth Centre Civic e Sociau de Salardú a on s’inclodís era direccion d’òbra, projècte basic e projècte executiu o eth tiratge entara designacion des Meses electoraus entàs eleccions europèes enes poblacions de Salardú e Arties.