Er Ajuntament de Naut Aran a notificat as vesins deth municipi mejançant era plataforma Ebando que pendent aguest ostieu s’an observat conductes d’un excessiu usatge dera aigua potabla entà amiar a tèrme es labors de règ en diuèrsi espacis dera zòna. Entre eri, destaquen er usatge entà règ automatic, aspersors, prats, uarts o jardins.
En aguest sens, des deth consistòri s’a iniciat ua campanha entà hèr préner consciéncia as pròpris vesins deth territòri a rebaishar era quantitat d’emplec d’aguest element vitau que s’utilize damb massa abondància. Cau destacar qu’era zòna de Naut Aran non se tròbe en cap cas en risc de sequèra e que toti es indicadors d’aigua se tròben en nivèus estables. Totun, hònts deth consistòri concrèten que “damb totes es restriccions que se hèn es diuèrsi endrets de Catalonha autant coma en Espanha non podem permeter-mos eth hèt de mauversar aigua damb un usatge excessiu d’aguest ben comun entà toti”.
Ei per açò, qu’er Ajuntament de Naut Aran a decretat telematicaments que recomanen a toti es vesins deth municipi que non utilizen era aigua entà regar cap zòna verda des 09:00 deth maitin enquias 20:00 dera tarde, e non hèr-ne us mès de 30 menutes per jornada e dia.
Damb aguesta mesura, eth consistòri preten hèr un pas tà deuant ena sostenibilitat d’un recors tan important coma ei era aigua.