Era Entitat Municipau Descentralizada d’Arties e Garòs a finalizat es òbres d’enlumenat public qu’executaue des de darreries d’an e qu’an coma objectiu era milhora ena eficiéncia energetica ena poblacion d’Arties en diuèrsi punts d’aguest endret.
Eth projècte, damb un pressupòst de 105.000 èuros, a estat subvencionat peth PUOSC (Plan Unic d’Òbres e Servicis de Catalonha) per valor de 81.410 èuros. Atau donc, eth consistòri a auut de hèr ua aportacion fòrça menor entà amiar-la a tèrme. En aguest sens, s’a actuat en tres lòcs claus: eth prumèr, en plea carretèra C-28 ath pas pera poblacion d’Arties entà garantir era seguretat des pedons pera zòna e eth corrècte pas des veïculs; eth dusau, en lèu era totalitat des sòns carrèrs, damb ua lutz mès blanca entà poder passejar melhor a nautes ores dera tarde o ena net; e eth tresau, ena zòna deth Pump Track e eth futur Skate Park.
Sus açò, era bailessa dera EMD d’Arties e Garòs, Lina Fanlo, destaque que “auem destinat aguesti recorsi entà milhorar era nòsta eficiéncia energetica. Es lutzes ja èren vielhes e ara s’an metut ues LED mès modèrnes e damb un menor consum, qu’aportaràn fòrça mès illuminacion e seguretat as nòstes vies”. Ath delà, ahig que “damb aguesta accion s’acabe eth renauiment de tot er enlumenat public d’Arties”.
Aguesta subvencion deth PUOSC s’artenhec en an 2019 e s’auie de tèrme deth 2020 ath 2024 entara execucion definitiva des òbres.