Per prumèr viatge ena istòria deth Freeride World Tour, aguesta pròva arribe en Espanha, concrètaments ena estacion d’esquí aranesa de Baqueira-Beret. Serà deth 22 ath 28 de gèr e compdarà damb era preséncia des melhors riders deth mon entre es qu’en destaquen es corredors aranesi Aymar Navarro e Abel Moga. En aguesta pròva tanben i seràn es catalans Nuria Castán e Pau Riba que participaràn coma Wildcards.
Aguest eveniment aurà era sua ceremònia inaugurau eth pròplèu diuendres 21 de gèr tàs 18:00 dera tarde ena poblacion de Salardú, en cap-lòc de Naut Aran, a on se procedirà a hèr ua explicacion dera pròva mejançant un ‘briefing’ atau coma era possibilitat d’obtier ua signatura des reconeishudi competidors. Era zòna escuelhuda entà realizar era competicion era dimenjada serà era deth Tuc de Bacivèr, ua montanha damb fòrça pendent e qu’as corredors les calerà afrontar-la damb abilitat e espectacularitat ena sua baishada entà obtier eth maximom de puntuacion per part des jutges.
OLYMPUS DIGITAL CAMERA
Eth baile de Naut Aran, César Ruiz-Canela, destaque que “acuélher un eveniment d’aguestes caracteristiques en casa nòsta, en nòste municipi ei tot un èxit e mos a d’aumplir de gòi. Gràcies ad aguesta pròva Naut Aran se plaçarà en mapa internacionau deth Freeride pendent aguesti dies e credem qu’aurà ua bona repercusion sociau e economica enes pròplèus ans.”
Eth consistòri a destinat un totau de 50.000 èuros coma patrocinador entara consecucion d’aguesta pròva, atau coma tot eth supòrt logistic que sigue de besonh.
Era competicion de Baqueira-Beret serà era prumèra arturada oficiau , mès, posterioraments eth circuit viatjarà enquia Ordino-Arcalís, en Andòrra, entà seguir era sua trauèssa enquias païsi de Canadà, Àustria e Soïssa a on serà era gran finau. Era competicion se poderà seguir a trauès deth streaming oficiau de Freeride World Tour en Youtube.